Kulpane i Faråni er stengde 23.juni - 10.juli
Frå 23. juni til ca. 10. juli 2026 må lukene på dam Farå i Valle opnast på grunn av nødvendige oppgraderingsarbeid på dammen. Det vil då vere fare for plutseleg høg vassføring, ei flaumbylgje, nedover elvefaret. Av omsyn til tryggleiken blir badeplassane langs elva Faråni sperra av medan arbeida går føre seg. Valle kommune er informert.
Dam Farå består av ein betongdam og ein steinfyllingsdam, i tillegg til eit vassinntak som fører vatn frå Faråni-vassdraget til Brokke kraftverk.
Tryggleiksnivået til dammen blir no oppgradert til dagens forskriftskrav. Blant arbeida som skal gjerast, er å forsterke betongdammen med eit ekstra lag betongstøyp, leggje på ny steinplastring på steinfyllingsdammen og oppgradere luker og teknisk utstyr.
Arbeida må utførast i den varme årstida, og i ein periode der det normalt er minst vasstilsig.
Tryggleik har førsteprioritet
Omsynet til tryggleiken har alltid høgaste prioritet i Å Energi Vannkraft. Vasstanden ved dammen må i ein periode senkast for å få tilgang til å utføre arbeida. Det vil auke vassføringa nedover Faråni betydeleg, og områda nedanfor dammen vil av omsyn til tryggleiken bli stengde for ferdsel.
Å Energi Vannkraft oppmodar alle som ferdast i området, om å vere varsame og respektere skiltinga og sperringane langs elvefaret.
Sjå kor raskt vassføringa kan auke når damlukene blir opna i denne filmen. Sjå òg vedlagde bilete.
Fakta:
Prosjektet har ein investeringskostnad på rundt 25 millionar kroner og vil auke levetida til dammen med 70 år.
Oppgraderinga vil òg bidra til at dagens produksjon i Brokke kraftverk kan haldast oppe framover.
Prosjektet starta i januar og blir etter planen ferdigstilt i november.
Oppgraderinga av dam Farå er ein del av Å Energi Vannkraft sine planar om å investere rundt 11,5 milliardar kroner i eksisterande anlegg og utvikling av nye, lønsame kraftprosjekt fram mot 2035.
