Ny dagleg leiar er tilsett!

Det er med stor glede vi kan meddele at Jon Alexander S. Hertzberg (51) er tilsett som ny dagleg leiar for både Brokke AS og Brokke Alpinsenter AS.

Jon Alexander S. Hertzberg har lang erfaring frå ulike leiarroller i fleire selskap i Noreg innan sal og merkevarebygging. Han er også kjent for si lange fartstid hjå Hovden Alpinsenter, der han har arbeidd innan fleire avdelingar som drift, utleige, skiskule, arrangement, konkurransar og bygging av park, heilt fram til i dag. I tillegg har Jon tidlegare vore skileiar på Hovden innan både alpint, telemark, langrenn og snowboard. Hans store interesse for vinteridrett har også ført til engasjement i trenarteamet til sonen, som no er på veg inn i internasjonal elite innan snowboard.

– Med Jon Alexander S. Hertzberg på plass har vi fått inn ein engasjerande, hyggeleg og fagleg sterk person innan utvikling av skisenter og vinteropplevingar, i tillegg til at han har god kompetanse for å utvikle publikumsarrangement heile året. Vi har stor tru på at vi har fått på plass ein dagleg leiar som vil skape engasjement i regionen, og som vil fremje ei sterk vidareutvikling av Brokke som ein samlingsstad for heile familien, seier Harald Eikrem Andersen, styreleiar i Brokke AS.

– Eg føler eg er fødd til akkurat denne jobben, seier Jon Alexander S. Hertzberg, og fortel kor begeistra han blei då han såg stillingsutlysinga. Brokke i Valle kommune er eitt av dei områda som eg synest har gjort ein fantastisk jobb dei siste åra, og det har vore ei imponerande og god utvikling. No ønskjer eg å samle kreftene for å løfte kvaliteten i alle ledd, og få oss til å samarbeide for å oppnå ei spennande vidareutvikling av destinasjonen. Her treng vi eit stort engasjement frå alle! Målet må vere at Brokke skal bli ein endå meir levande stad som tilbyr alt frå naturopplevingar og rekreasjon til meir fartfylte opplevingar – året rundt.

Eg gler meg til å samle våre flotte tilsette, hytteeigarar, fastbuande, samarbeidspartnarar, grunneigarar og lokalpolitikarar for å finne vegen vidare saman i Brokke. Målet er å lykkast både som ferieområde, hytteområde og destinasjon, og bidra til å utvikle større krysseffektar for næringslivet i kommunen, avsluttar Jon Alexander S. Hertzberg